艷照門? (居然用到”門”尼個術語,大件事到呢…)

基本上,我想講既野,尼幾篇講哂:

新春秋/Pandemonium:小姐，妳幹嗎要道歉？
聞.見.思.錄: 好天真好傻之後
刁民公園: 你會在死亡筆記寫下偽人的名字嗎？
刁民公園: 虛偽(二)：幸而仍有揭示真相的XX
人在中環: 假如我是她們(二)
人在中環: 手下留情

又,再加多以下幾句:

小的實在孤陋寡聞,最近先知:

原來D警察同內地公安交流得好好架!砌生豬肉叻到呢!又好高科技呀!原來可以拉完人先“估”人地“將來會有可能”犯咩罪,好“未來報告”呀!

原來人窮又有卡數在身一定身痕想勒索人架!遲早都會!

原來“虛偽”好大獲架!會毒害哂所有小朋友既心靈,傷害六百萬香港人甚至幾十憶中國人感情,仲可以上幾個禮拜頭版,上埋社論,仲唔可以上台做善事架!咁D乜乜慈善總理唔駛撈啦,大把捐款唔使收啦!一有慈善組織搵藝人做代言或籌款就唔使捐錢啦!好多擺到明沽名釣譽喎!

原來係私人地方造愛最多可以擺傳教士姿勢,最好着住衫,三點不露,唔係就好淫蕩架啦!原來明光社有好多會員架!原來我地仲係家春秋年代!原來香港人咁有道德!

原來D家長好天真好傻,D藝人話佢地係小天使佢地又信哂喎,又靠哂人地做傍樣,佢地自己唔使教仔女既!

原來D人一路話英皇點點點,D傳聞又個個都信到足咁款,呀嬌單野一出就話人虛偽,而家邊個虛偽先!

呀李怡先生你咁激動,即係信人地一向都係小天使啦,但你老細D人成日去偷窺D小天使喎,咁點先呀老天真!

原來因為“唔小心”而流出來既私隱係有公諸於大眾既需要架!

原來黃子華真係好啱,香港人真係好鐘意睇人仆街架! 點樣可以咁多仆街野睇?將個道德標準set到天咁高咪得啦!

**********************************************

成件事咪就係一個自以為溝死女既男人真係昆到D女仔同佢影床照D女仔又傻傻地肯影,跟住個男人又唔Care D相有幾重要任得佢流左出去,然後大家食住花生等睇戲,順便有仇報仇同發洩一下悶爆既情緒!

使乜搞到咁大單姐!

香港既娛樂圈人仲係咁無見識, 完全漠視世道,政治上只識邊個有權靠邊個,演藝題材又多數食老本(不過得承認電影界比較進取),若果D女星夠膽在流出三四張相時出來自我引爆,話一句:“我承認D相係真既,我否認緋聞係唔誠實,但我無做犯法既事亦無搶人老公,普通男歡女愛有幾錯?我信錯左人比佢影相,估唔到個男人咁吾小心處理,出左事就一走了之,我D私隱俾人睇哂,我先係受害者!”- 嘩咁我會開始覺得香港既娛樂圈有得救, 而家個記招講到唔湯唔水,出頭既演藝人協會剩係識得在背後叫拉人,商台請佢地上論譠代表演藝界討論下又唔出現, 因為佢地唔識討論比較深入既問題? 驚上去收phone-in 俾人鬧?

莫非真係有集體念力尼回事,今次咁色香味俱全,搞到香港人太high,D念力搞到警署同律政署short左?

在商台論譠“擬似”係何式凝講: 有咁既人民就有咁既社會, 傳媒, 政府…雙向既!

呢次個個都輸! 輸得好難睇!